Politika e privatësisë

Më poshtë janë të gjitha rastet kur përpunojmë të dhëna personale, qëllimi dhe baza ligjore për secilin.

Nga vijnë të dhënat. Shumicën na i jepni vetë në formular ose në llogari. Nëse aplikoni personalisht ose me telefon, aplikimin e regjistron stafi ynë. Llogarinë e studentit e hap stafi nga një regjistrim i konfirmuar: emri që shfaqet dhe adresa e profilit krijohen nga emri dhe mbiemri juaj, dhe regjistrimet me të njëjtin email lidhen me llogarinë tuaj. Stafi mund të lidhë me llogarinë tuaj edhe një regjistrim me email tjetër, kur e dimë se është i juaji.

Të dhënat e shënuara si të detyrueshme në formularin e aplikimit na duhen për ta shqyrtuar aplikimin. Pa to nuk mund t'ju regjistrojmë. Fushat opsionale mund t'i lini bosh. Nuk mbledhim data lindjeje, numra letërnjoftimi apo të dhëna të ndjeshme (p.sh. shëndetësore) dhe ju lutemi mos i shkruani ato në fushën e mesazhit.

Kutia në formular konfirmon që kërkoni të kontaktoheni për regjistrimin; nuk është pëlqim për marketing. Nuk ju dërgojmë email-e marketingu. Nëse ndonjëherë do ta bëjmë, do t'ju kërkojmë pëlqim të veçantë dhe çdo mesazh do të ketë mundësi çregjistrimi. Në atë rast, nëse kundërshtoni marketingun e drejtpërdrejtë, do ta ndalojmë përdorimin e të dhënave tuaja për këtë qëllim brenda 8 ditëve nga marrja e kundërshtimit dhe do t'ju konfirmojmë me shkrim brenda 5 ditëve të tjera (neni 20 dhe neni 74, paragrafi 1 i Ligjit nr. 06/L-082).

Nuk marrim vendime për ju vetëm në mënyrë automatike dhe nuk bëjmë profilizim.

Verifikimi i certifikatës. Çdo certifikatë ka një kod QR dhe një link verifikimi. Kushdo që ka këtë link mund të shohë emrin dhe mbiemrin tuaj, programin, numrin e certifikatës dhe datat e përfundimit e të lëshimit. Asgjë tjetër nuk shfaqet (as email-i, as telefoni). Faqja e verifikimit nuk indeksohet nga motorët e kërkimit dhe kodi është i rastësishëm, kështu që praktikisht nuk mund të hamendësohet. Me kërkesën tuaj mund ta çaktivizojmë verifikimin publik. Kjo e heq certifikatën edhe nga llogaria dhe portofoli juaj, dhe kushdo që e kontrollon do ta shohë si të pagjetur.

Profili publik i portfolios. Profili juaj është privat, përveç nëse e bëni publik vetë te Profili. Kur është publik, kushdo, edhe motorët e kërkimit si Google, mund të shohë:

• adresën e profilit, emrin që shfaqet, foton, biografinë, linqet dhe gjeneratën;
• projektet që publikoni: titullin, përshkrimin, programet e përdorura, datën e publikimit, nëse projekti është i veçuar, fotot me përshkrimin (alt), fazën dhe dimensionet e tyre;
• certifikatat: programin, numrin, datat dhe linkun e verifikimit, i cili tregon emrin e plotë që është në certifikatë.

Emri që shfaqet, biografia (te profili), si dhe titulli dhe përshkrimi i projektit (te faqja e projektit) përdoren edhe si titull/përshkrim i faqes në motorët e kërkimit dhe kur ndahet linku; nëse keni certifikatë, përshkrimit të profilit i shtohet "Certifikuar nga TenTen Academy." Mund ta ktheni profilin privat në çdo kohë: faqet pushojnë së shfaquri brenda pak minutash, dhe linqet e fotove që janë dhënë më parë skadojnë brenda 60 minutash. Kopjet që motorët e kërkimit ose të tjerët mund të kenë ruajtur ndërkohë nuk janë nën kontrollin tonë.

Fotot. Fotot ngarkohen drejtpërdrejt nga shfletuesi juaj në hapësirën tonë private të ruajtjes. Pastaj përpunohen: u hiqen të dhënat e fshehura të skedarit (EXIF, si modeli i kamerës dhe vendndodhja GPS) dhe fotove të projekteve u shtohet një vulë me emrin tuaj që shfaqet dhe "TenTen Academy". Emri në vulë është ai që keni në momentin e përpunimit. Origjinali i fotos së profilit fshihet pas përpunimit. Origjinalet e fotove të projekteve ruhen privatisht derisa ta fshini foton ose projektin, dhe mund të përmbajnë ende këto të dhëna. Nëse nuk doni që ne t'i kemi, hiqni vendndodhjen nga fotot para se t'i ngarkoni. Kur fshihet një llogari, fshijmë të gjithë skedarët e saj nga hapësira e ruajtjes, përfshirë ata që kanë mbetur nga ngarkime të ndërprera. Nëse fshirja e skedarëve dështon për arsye teknike, stafi njoftohet dhe skedarët i fshijmë manualisht sa më shpejt.

Të dhënat tuaja i shohin vetëm anëtarët e stafit që kanë nevojë për to dhe kanë leje të caktuara në sistem. Përveç tyre:

• Cloudflare, Inc. (SHBA): mbrojtja dhe shpërndarja e faqes, verifikimi kundër robotëve (Turnstile) në formularin e aplikimit, ruajtja e skedarëve që ngarkoni (R2) dhe shpërndarja e fotove drejtpërdrejt te shfletuesi juaj.
• Zhvilluesi dhe mirëmbajtësi teknik i faqes, vetëm kur është e nevojshme për mirëmbajtje.
• Google LLC (SHBA): vetëm nëse pranoni përmbajtjen e jashtme te faqja e kontaktit.
• Meta (WhatsApp, Instagram) ose TikTok: vetëm nëse ju na shkruani atje ose na kërkoni t'ju kontaktojmë atje.
• Autoritetet publike, vetëm kur ligji na detyron.

Faqja publike dhe sistemi ynë i të dhënave (API) janë aplikacione të veçanta, në adresa (domene) të ndryshme, dhe shfletuesi juaj lidhet drejtpërdrejt me të dyja. Ofruesit e serverit, të email-it dhe të ruajtjes së skedarëve i përpunojnë të dhënat vetëm sipas udhëzimeve tona, si përpunues. Cloudflare i përpunon të dhënat si përpunues në emrin tonë, sipas marrëveshjes së vet për përpunimin e të dhënave; vetëm për përdorimin e të dhënave teknike të verifikimit Turnstile (adresa IP, të dhëna të lidhjes dhe të shfletuesit) për përmirësimin e mbrojtjes së vet nga robotët, Cloudflare vepron si kontrollues i pavarur.

Për ngarkimin e hartës dhe dërgimin e adresës suaj IP te Google jemi kontrollues të përbashkët me Google; për përpunimin e mëtejshëm Google vepron si kontrollues i pavarur, sipas politikave të veta. Për këtë pjesë të përbashkët nuk kemi marrëveshje të veçantë me Google: ne jemi përgjegjës që harta të ngarkohet vetëm me pëlqimin tuaj dhe t'ju japim këtë informacion, kurse Google është përgjegjës për të dhënat që merr. Të drejtat tuaja mund t'i ushtroni ndaj nesh ose ndaj Google (neni 25, paragrafi 3 i Ligjit nr. 06/L-082). Nuk i shesim dhe nuk ua japim të dhënat palëve të treta për marketing.

Transferimi jashtë Kosovës. Cloudflare, Inc. dhe Google LLC janë kompani amerikane, të certifikuara sipas Kornizës së Privatësisë së të Dhënave BE–SHBA. Agjencia për Informim dhe Privatësi, me Vendimin nr. 22/2025 të datës 30.04.2025, i ka përfshirë Shtetet e Bashkuara (për organizatat e certifikuara sipas kësaj kornize) në listën e vendeve me nivel të duhur të mbrojtjes së të dhënave (nenet 44–46 të Ligjit nr. 06/L-082). Në të njëjtën listë janë edhe shtetet e BE-së dhe të ZEE-së, Zvicra dhe Mbretëria e Bashkuar. Nëse ofruesi i serverit ose i email-it ndodhet jashtë Kosovës, të dhënat i transferojmë vetëm në një vend që është në këtë listë ose, ndryshe, vetëm me autorizimin e Agjencisë sipas nenit 49 të ligjit. Nëse kjo listë ndryshon, e përditësojmë këtë politikë.

Për sigurinë e faqes (mbrojtja nga spam-i, kufizimi i numrit të kërkesave, regjistrimi i adresës IP që kërkon linkun e hyrjes, regjistrat e serverit) dhe për verifikimin publik të certifikatave mbështetemi te interesi ynë legjitim. I kemi peshuar këto interesa me të drejtat tuaja: përdorim vetëm sa të dhëna nevojiten, i ruajmë për kohë të kufizuar dhe verifikimi i certifikatës shfaq vetëm të dhënat që janë tashmë në certifikatën që ju vetë e shpërndani. Verifikimi mbron edhe ju, sepse e bën të vështirë që dikush të paraqesë një certifikatë të rreme në emrin tuaj. Mund ta kundërshtoni këtë përpunim në çdo kohë (shih pikën 7).

Përdorim lidhje të enkriptuara (HTTPS), hyrje pa fjalëkalim me linqe njëpërdorimëshe që skadojnë pas 15 minutash, kodet e hyrjes ruhen vetëm si hash, qasje të kufizuar për stafin sipas rolit, kufizim të numrit të kërkesave dhe ruajtje private të skedarëve. Asnjë sistem nuk është plotësisht i pacenueshëm. Nëse ndodh një shkelje e të dhënave, e njoftojmë Agjencinë pa vonesë dhe jo më vonë se 72 orë pasi marrim dijeni, përveç kur shkelja nuk paraqet rrezik për ju; ju njoftojmë drejtpërdrejt pa vonesë kur shkelja paraqet rrezik të lartë për ju (nenet 33 dhe 34 të Ligjit nr. 06/L-082).

Sipas Ligjit nr. 06/L-082 keni të drejtë:

• të dini nëse i përpunojmë të dhënat tuaja dhe të merrni një kopje të tyre;
• të kërkoni korrigjimin e të dhënave të pasakta;
• të kërkoni fshirjen e të dhënave, përfshirë fshirjen e llogarisë, përveç atyre që ligji na detyron t'i ruajmë;
• të kërkoni kufizimin e përpunimit;
• të merrni të dhënat që na keni dhënë në një format të lexueshëm nga kompjuteri (bartshmëria);
• të kundërshtoni përpunimin që bazohet në interesin legjitim (shih më poshtë);
• të tërhiqni pëlqimin në çdo kohë, pa ndikuar në ligjshmërinë e përpunimit para tërheqjes;
• të paraqitni ankesë te Agjencia për Informim dhe Privatësi (neni 52; shih pikën 9);
• të kërkoni mbrojtje gjyqësore dhe kompensim të dëmit (nenet 54 dhe 56).

E drejta e kundërshtimit. Për arsye që lidhen me situatën tuaj të veçantë, mund ta kundërshtoni përpunimin që bazohet në interes legjitim në çdo kohë; atëherë e ndalojmë, përveç kur kemi arsye bindëse legjitime që mbizotërojnë ose kur na nevojitet për një pretendim ligjor.

Për t'i ushtruar këto të drejta na shkruani në [email protected]. Mund t'ju kërkojmë të konfirmoni identitetin. Përgjigjemi falas brenda një muaji. Ky afat mund të zgjatet edhe për dy muaj të tjerë; në atë rast ju njoftojmë brenda muajit të parë, bashkë me arsyet. Nëse nuk veprojmë sipas kërkesës suaj, ju njoftojmë brenda një muaji për arsyet dhe për të drejtën t'i drejtoheni Agjencisë ose gjykatës (neni 11, paragrafët 3–4 i Ligjit nr. 06/L-082). Fshirjen e llogarisë dhe eksportin e të dhënave i bën stafi ynë me kërkesën tuaj; nuk ka buton për këtë në llogari. Eksportin jua dërgojmë me email si skedar (JSON) me të dhënat që ruajmë për ju në sistem; fotot përfshihen si linqe të përkohshme që skadojnë pas 60 minutash, prandaj me kërkesë jua dërgojmë edhe vetë skedarët e fotove. Nëse doni edhe të dhëna që nuk janë në eksport (p.sh. cili anëtar i stafit ka regjistruar një pagesë), na i kërkoni. Me kërkesën tuaj e ndryshojmë edhe email-in e llogarisë; këtë e bën manualisht ekipi ynë teknik, prandaj mund të zgjasë disa ditë pune.

Disa gjëra mund t'i bëni vetë te llogaria: ta ktheni profilin privat; të ndryshoni emrin që shfaqet, adresën e profilit, biografinë dhe linqet; të ndryshoni titujt, përshkrimet dhe përshkrimet e fotove (alt); dhe të fshini projektet, fotot dhe foton e profilit.

Në formularin e aplikimit nuk e kërkojmë moshën. Gjatë regjistrimit stafi ju pyet nëse jeni nën 18 vjeç; nëse po, pëlqimin e prindit ose kujdestarit e marrim me shkrim bashkë me kontratën, sepse bëhet fjalë për një kontratë. Nëse jeni nën 16 vjeç, edhe pëlqimet për të dhënat (profili publik, harta e Google) i jep prindi ose kujdestari. Para se ta bëni profilin publik, konfirmoni që, nëse jeni nën 18 vjeç, prindi ose kujdestari pajtohet. Nëse mësojmë se profili i një të mituri është publik pa këtë pëlqim, fshehim pa vonesë projektet e tij, i kërkojmë ta kthejë profilin privat dhe kontaktojmë prindin ose kujdestarin; nëse profili nuk kthehet privat, e fshijmë llogarinë (neni 7 i Ligjit nr. 06/L-082).

Nëse jeni prind ose kujdestar: emrin, nënshkrimin dhe datën e pëlqimit tuaj i marrim kur nënshkruani pëlqimin bashkë me kontratën e trajnimit. I përdorim vetëm si dëshmi të pëlqimit dhe i ruajmë bashkë me regjistrimin. Të drejtat e përshkruara në pikën 7 i keni edhe ju.

Nëse mendoni se i përpunojmë të dhënat tuaja në kundërshtim me ligjin, mund të ankoheni te autoriteti mbikëqyrës. Do të ishim mirënjohës nëse na shkruani së pari, që ta zgjidhim bashkë.

• Agjencia për Informim dhe Privatësi (AIP)
• Rr. "Zejnel Salihu" nr. 22, 10000 Prishtinë
• [email protected]
• aip.rks-gov.net

Përdorim vetëm cookies dhe hapësirë ruajtjeje në shfletues që janë të domosdoshme ose funksionale (p.sh. për hyrjen në llogari). Harta e Google ngarkohet vetëm me pëlqimin tuaj. Të gjitha detajet janë te Politika e cookies.

Kur e ndryshojmë këtë politikë, e përditësojmë datën në krye të faqes. Nëse ndryshimet janë të rëndësishme, ose nëse duam t'i përdorim të dhënat për një qëllim të ri, ju njoftojmë paraprakisht me email ose në faqe.

Kontrollues i të dhënave është operatori i TenTen Academy:

• Emri: TenTen Academy
• Adresa: Dukagjini Tower, Prishtinë
• Email për çështje privatësie: [email protected]
• Faqja: tenten.academy
• Telefoni: +383 49 10 10 28

Nuk kemi caktuar zyrtar për mbrojtjen e të dhënave, sepse nuk jemi në asnjë nga rastet kur kjo është e detyrueshme sipas nenit 37, paragrafi 1 i Ligjit nr. 06/L-082. Për çdo pyetje rreth të dhënave tuaja na shkruani në [email protected].